أناديكي

أناديكي
بقلم: صلاح سالم عروة

أناديكي

أنوّر ليل لياليكي
يا عمر العمر يا عمرى يا روح الروح
أشوف الضحكة ف عنيكي بصوت مسموع
وَلا تشوفي ف يوم أبدا حزين موجوع
ولَا يعرف ف يوم الحزن دنيتنا
ولا نعرف ألم ودموع
ولو سكّتنا هاتطوّل.. ولو نبدأ من الأول
هاقيد لك من صوابعي شموع
تنور لك لياليكي وتهديكي
وع الأحزان تقوّيكي
وأرسم للأمل سِكّة على الافراح توديكي
وهافضل برضه أندهلك واناديكِي
وأفرد خطوتي ليكِ

واناديكي

يا ست الكل يا عبلة أنا عنتر
حاربت الدنيا وبسيفي اللي متكسر
ومهما شوفت انا عارف هاشوف أكتر
يقول لي زماني شوف غيرك دا كان أشطر
حاربت اليأس بالإيمان وبعنيكي
وهافضل برضه أندهلك واناديكِ
وأفرد خطوتي ليكِ

أناديكي

يا ناعسة يا شايلة جبال الصبر انا أيوب
أم الضفاير دهب مالت عليها قلوب
ده لما ييجي الهوا ويمر بيكي يا دوب
ينهل شعرك على كتفك دهب مسكوب
ماتجيبي صبرك على صبري يا ست الناس
ده الصبر يقدر يداوي معظم جروح الناس
دي إيديكي تنباس يا ست الكل وعنيكي
هاشيل القلب ف كفوفي واهاديكي
وطول العمر هاندهلك واناديكِ
وازرع جناين أمل تخضر حواليكي
يهون العمر علشانك ويفديكي

واناديكِي