حلم بقلم: أحمد حواس مفيش حلم اتولــــد بيموت ساعات بيغيب بيكبر عادي ويعجز وشعره يشيب ده عنقود العنب عادي بيدبل بس في الآخر بيبقى زبيب عجيبة دنية الغلبان وصعبة دنية الحالم بتمشي سالكة للظالم وتيجي لحد أحلامنا وتمشي شمال وبالشقلوب زمان قالوا اللي راح يصبر ينول كــل اللي يتمناه فضلنا نزرع الصبار ونتصبر ولا نولنا.. ولا نيلة بيتقل حملنا.. نشيله ونربط حلمنا في ديله وتحني ضهرنا.. الشيلة ولا فكرنا مرة نتوب حزين اللي اتولد شاعر وكل رصيده م الأحلام حروف باهتة بيتعارك مع الدنيا على عمر اتسرق منه وشكله اللي ماهوش لايق على سنه وقلبه اللي يادوب سانده بقالب طوب مفيش حد اتولد شايل في جيبه ذنوب وعاش العمر يلضم يومه ف همومه بخيط دايب وكله عيوب محدش فينا شاف الحلم متفصل على توبه ومتفسر يكون العشق مكتوبه ومات هربان من المكتـــــوب
