تَهنئة مِن القلب واجبة للشاعر الخلوق محمد طلعت، والذي حَصل اليوم ورسميًا علىٰ عضوية اتحاد كتاب مصر، وقد كانَ استحقاقًا يَليقُ بهِ، فهنيئًا له وللاتحاد وتمنياتنا لهُ بخالص التوفيق والسَداد.
مقبوض وخايف تبقى من أهل الوجع
ما انت اللى عايز تبقى زى الناس تحب
وتحكى ف القعدات بإنك زير نسا
ما الأغبيا
بدءوها لعب ف أى حاجة ماحسوهاش
وأنت ببلاش
لميت مشاعرك بين إيدين مزروعة شوك
لمعوك وهيئوك
وبين إيدين رسام بيرسم لوحة ليك
رابطين إيديك على حلمهم وبيدبحوك
ركبت نفسك ع الحصان
ومشيت بحلمك عكس ريح الأمنيات
خليت جناحك يحمى من ضوء الشعاع
وباقى جسمك سايبه بين الناس مشاع
والضياع
كان لسة عنوان القصيدة المكتوبالك
راسمين خيالك جنب حبل المشنقة
وصورة ليك جنب منها معلقة
وإنت ف إيديك المعلقة بتحلى آخر بق شاى
هو انت إيه وليه بقيت زى العجين
بيشكلوك على شكل هما محتاجينه
على دمية شايلة عقلها وربطه عينها
شوف الملامح تحت رجلك وانت دايس
هتشوف حبيبتك عامله بيك مسرح عرايس
وخيوط حركتك لسه بيها مسيطرة
عايزاك فى إيدها ماشى زى المسطرة
المبهرة
كانت ف بحرك عاملة بحر لنفسها
لافة ضفاير حلمها على صورة ليك
ولون عينيك
كان حلم عدسة واقعة
ف جفون النهار
ساحبة الوريد بتفك أوجاعه بمرار
واللى كنا بنحسبه جواك حياك
مطلعش عاش
كان لسه ف جهاز الحياة ملفوف بشاش
واخد جروح متفرقه على كل أركان الأمل
كان محتمل أنه يكون محتاج يعيش
كان باقى من أوراق دخوله
كعب فيش
علشان فى أول حب ليه
تهموه بتشنيع الغرام
وانت من طيبة هواك
صدقت من عينه الكلام
وبقيت ضحية ف قلب قايمة الانتظار
من كتر إحساس المرار عمال تدق
بتدق ليه
بتدق ليه
