أنا حاسس إنِّي ما عشتش
زي ما خططت وعايز
وزعوا م الحظ ما أخدتش
لا نصيب ولا حتي جوايز
بالنسبة لواحد زيي
مفروض هيكون له نصيب
لكن من حظي وبـختى
الحظ نشـانه يخيب
فـ افضل اجري واتنطط
من حي لحي لشارع
على ماضي قديم واتـشعبط
ألقاني في جملة مـضارع
مرفوع من كف بكف
وساعات مركون على رف
مجرور م الياقة بحرف
مع ظرف واقف يتمايع
أنا حاسس إنِّي ماعشتش
مسحول على ضهري في شارع
وقالوا لي اسكت ما سكتش
وگأنِّي أبكم مش سامع
بالنسبة لواحد زيى
مفروض يسمع ويطيع
ويقول للحاضر حاضر
ما الماضى بجد فظيع
لكن أنا واخد عهد
ما ابتش في يوم مغصوب
علي حاجه ماهيش على كيفي
إن شالله أموت مصلوب
والطير يأكل من لحمي
والناس تحدفنى بطوب
راح أقول اللي يريحنى
لو كله غلط وعيوب
وإن كان على الصبر ومره ناعسة عرفت توصل له
بضفاير جيدها تجره
تسقيه كله لأيوب
