عفويات

عفويات

بقلم: عادل عوف

تسقسق بقسماط روحك
في مج الحب لما تبوش
عشان ياكلك حبيبك هم
وتتّحدوا ما تتفارقوش
تدوب روحك وتتفتت
وترسي يا غشيم في القاع
وعشمان لسة ومتبت
وماسك في الأمل بصباع
غريمك في الغرام تلاقيه
جاتوه ملفوف علي سواريه
منين ماتروح هتعتر فيه
في إيده صحبتين نعناع

كبيرك تبقي تصبيرة في قَرص الجوع
وسمسم أمرك الغالي ما هوش ممنوع
مهزق روحه ومفرفط على الفاضي
نزل فـ الغفلة فوقْ حجرها كام نوع

وشوقك كحك بالسكر ومليان سمن
وله سطوة وله قيمة وعشق قديم
صحيح يعني بتشتاق لك دا لما تحن
لكن بيمنعها في المطلق غرامها رچيم

فلم الهرد من حلمك وما طولش
دا صاج الحب مش صاجك ففوق يا حزين
وسيب له الدنيا من فضلك وما تسلمش
وشوفلك حد أشواقه خمير وطحين