طقس متطرف بالغد ودرجات حرارة تاريخية متوقعة اكبر من اللي تم تسجيلها اليوم على بعض المناطق كاقوى موجة شديدة الحرارة لاهبة في هذا الصيف.
اسوان سجلت اليوم 47.6 درجة مئوية والاقصر 47.4 درجة مئوية وهي اعلى من المعدل الطبيعي بالنسبة للوقت ده من السنة بكثير غير ان في اماكن بالصحراء كان متوقع عليها 50 درجة مئوية ولكن مفيش محطات رصد فيها فمفيش اي بيانات عنها.. فايه المتوقع بكره في ظل الموجة شديدة الحرارة القاسية اللي بنتعرض لها؟
شوف يا صديقي هيحصل بكره زيادة في قوة الموجة شديدة الحرارة بسبب اشتداد الكتلة الهوائية الحارة اللي بتسيطر على مصر بسبب زيادة قوة المرتفع المداري العلوي اللي بيمنع حدوث عملية صعود الهواء لاعلى لتبريده لتشكل ظاهرة القبة الحرارية.
وبالتالي متوقع زيادة ارتفاع حاد اخر في درجات الحرارة وملامستها ل 50 درجة مئوية وممكن تتجاوز ده على بعض مناطق جنوب الصعيد ولكن للاسف مفيش محطات رصد كفاية في المناطق السكنية والصحراوية وبالتالي مفيش بيانات الا توقعات فقط
الاجواء شديدة الحرارة الرطبة نهارا ومائلة للحرارة الى حارة ليلا حاضرة على كافة انحاء مصر ما عدا السواحل الشمالية هتكون حارة رطبة نهارا ولطيفة الى مائلة للحرارة رطبة ليلا ودرجات الحرارة هتوصل غدا لاقصى ارتفاع لها في العموم والدلتا هتسجل بين 40 الى 46 درجة مئوية والقاهرة هتسجل بين 41 الى 44 درجة مئوية والصعيد حدث ولا حرج وتسجيلها فعليا في بعض المناطق الصحراوية 50 درجة مئوية وهو اللي متوقع استمراره بالغد
تحذيرات عالية الخطورة من التعرض لاشعة الشمس بالغد من الساعة 11 صباحا والى الساعة 5 بعد العصر بسبب ان مؤشرات الاشعة فوق البنفسجية وصلت للقيم القصوى وبكرر تاني على معلومة اننا لازم نلبس ملابس فاتحة من الالوان الابيض والاحمر والبرتقالي والاصفر لان لها قدرة عالية على عكس اشعة الشمس ولكن الالوان الغامقة والازرق والاسود فلها قدرة عالية على امتصاص اشعة الشمس مع شرب السوائل بصورة منتظمة لعدم التعرض للجفاف
تابع العدد الاول..ولو وصلت لهنا متنساش الشير عشان غيرك يعرف ان بكره ذروة الموجة شديدة الحرارة وياخد احتياطته قبل ما يخرج من البيت لان الخروج تحت اشعة الشمس مباشرة خطر
