أخبار مصر

* * القصة قصة نفوس * *

مصر المحروسة

وقت النشر : 2023/03/04 10:57:32 PM

كلمات: حاتم الغيطاني

مش قلت لك ياجدع
القصة مش قصة فلوس
القصة قصة نفوس

نفوس جلها الخبل
ولحسها داء الهبل
لما الطمع صابها
خيب فيها الأمل
كتر منها الزعل
شقق منها الجبل

مش قلت لك يا جدع:
القصة مش قصة فلوس
القصة قصة نفوس

نفوس بترسم وبتفكر
و بالكلام بتلف وتحور
لويجي منك مصلحة
في الحر تعمل مروحة
ولو مفيش مصلحة
تقلب و تعمل مطوحة
هو إنت ليه مابتسألش
نسيتنا وفيك ماتمرش
لو طال صاحبها يبيعك
هيبيع ويقبض التمن
طلع الحسيس خنيس
قالع و مش لبيس

مش قلتلك يا جدع
القصة مش قصة فلوس
القصة قصة نفوس

أصل الطمع بها مال
مبدأها هو المال
إن كان معاك تعشقك
وف كل حال ترفعك
وإن مال معاك الحال
ترميك مع الزبال
تنداس ولا تنباس
عود القصب عصب
بعد المصاص حطب
نفوس جلها الجرب
والقهر منها اتشرب
والصح منها الهرب

مش قلتلك يا جدع:
القصة مش قصة فلوس
القصة قصة نفوس

اهرب وما تزعلش
ربك كبير ما تخافش
هيعوضك عنهم
بعد العفش و الحوش
هتلاقي ناس حلوة
وللفراغ ملوة
وف كل ضيق سلوة

 

اقرأ أيضًا: يا مصر أعشق ترابك

               من 👈 هنا..

زر الذهاب إلى الأعلى