جبروت إنسان قصيدة عامية.. بقلم: مروة كرم محمد رشاد قوليلي ليه يادنيا معدياني وأنا فبحور الحياة غرقان لا عمرك كنتي مرضياني وكان أملي أعيش إنسان يدوب إنسان.. سنين من رضاكي مجفياني معيشة قلبي ذل و هوان دا من كاسات المر سقياني معومة روحي فبحور أحزان ومن شوك وردك كله كسياني مفرقة عني عبير كل الخلان قوليلي ليه يادنيا معدياني وانا كل اللي طلبه أكون إنسان يدوب إنسان.. يحب وقلبه من السعادة يفرح تحس روحه بشوية حنان شجرة أحلامي بالأمل تطرح تملئ ورود الربيع كل الأغصان عدي خريف فعمري كتير يجرح وأنا مش حاسس بأي أمان و سكينة الفراق فقلبي تدبح تنزف عيوني الدمع كما فيضان قوليلي ليه يادنيا معدياني وأنا كل اللي طلبه أكون إنسان يدوب إنسان.. كفاية مرايتي اللي كسراني خدوش الألم فوشي تبان مش عارف أنا اللي شايفها ولا هي اللي شَيفاني حقيقة قلب عاش عمره جبان مش عارف يواجه ألم الأحزان ولكن.. لكي عليا يادنيا يمين حلفان بإني ألون بالهنا دنيتي و كوني أعيش الحب بكل جنوني مع حبايبي اللي بيحبوني وأنسي كل اللي سجنوني فوحدة وحزن ورا قضبان هعيش إنسان جسور قادر علي العِصيان يعادِي زي متعادَي بقسوة زمان وشوفي يادنيا بعد متعافي من الخذلان هوريكي إزاي شِفا النسيان يخلق من الوجع جبروت إنسان..
