ابن الشهيد

ابن الشهيد

بقلم: محمد السيد السعيد يقطين

يا ماما يا أمي
نعم يا نور عيني وحبيبي
قوليلي يا أمي
بابا فين يا ترى
غايب ليه عن عيني
أصله كتير وحشني
ونفسي اشوفه يا أمي
يمكن زعلان مني
أو مش عاوز يشوفني
لا لا يا ابني
أبوك كان بيحبك
وعمره ما زعل منك
وكل خير اتمناه لك
وديما بيفكر فيك
ويسأل عنك
طب امتى هشوفه يا أمي
أصلي بفكر فيه تملي
وصورته دايمًا قدامي
نفسي أكون في حضنه
يطبطب عليه
وأبوس إيديه
وعمري تاني ما هزعله
وهكون عند ظنه
مالك يا أمي
ليه بتبكي
خلتيني أبكي
لا لا يا ابني
أنا مش ببكي
كلامك يمكن فكرني
بغلاوة أبوك عندي
لا يا أمي
فيه حاجة بتخبيها عني
أنا فهمت دلوقتي
أبويا سافر وسابني
بقيت لوحدي
انكسر قلبي
وحزين بدمعي
لا يا غالي يا ابني
أبوك عمره ماسابك
ولا باعك
وعمره ما فكر يبعد عنك
أبوك كان بيحبك
يا ابني أبوك
كان بيخدم وطنه
وعمره ما خلف وعده
وكان بيدافع عن أرضه
مات وراسه مرفوعة
وكلنا بنفتخر به
أبوك ربنا اختاره
يستشهد في سبيله
وهو لبى نداه
ومات فداه
شهيد لله
وشهيد لوطنه
الله عليه
واحنا معاه
في جنه ربه
بإذن الله