إختيار شريك الحياة

إيمان الغيتاوى

كل واحد فينا له طريقة خاصة فى إختيار شريك حياته ، فيه اللى مقتنع إنه لازم يمر بقصة حب ملتهبة زى قصة(عنتر وعبلة) و فيه اللى ممكن يتنازل شوية ويتجوز جواز صالونات بشرط إنه يختار بنفسه ، وفيه اللى هايتنازل أكتر ويرمى مسئولية الإختيار على الست الوالدة وخالته ويمكن أخته ( ده على إعتبار يعنى إنهم شوية حريم فى بعض ويفهموا بعض أكتر ) ، وبغض النظر عن صحة وخطأ نظرية كل واحد فى الثلاثة فخلينا متفقين إن إختيار شريك الحياة له أسس وقواعد لو إتبعناها هانكسب جوازة ناجحة بدل مانسيب الموضوع يعدى كده إعتباطًا وآهى جوازة والسلام ونتطلق عادى بعد أسبوعين .
من هذه الأسس ..
١- إننا نتأكد إن شريك الحياة ده كفء لتحمل مسئولية بيت وأولاد مش نختار بالشكل والجمال وبس وده طبعًا بنتأكد منه طول فترة الخطوبة واللى هى مش مجرد خروجات وفسح وورد رايح وساعات جاية _ لأ ياجماعة ؛ الخطوبة أصلًا إتعملت كفترة إختبار كفاءة لكلا الطرفين ، واللى ينجح فى التحديات دى يستاهل الفستان الأبيض والبدلة وشموع وورود فى آخر الطريق .

٢- إختاروا المتواضعين ياجماعة ، المتواضعين يعنى أيه ؟ يعنى الست اللى تيجى تعتذر عن سلوك عملته أو تعترف بطبع حاد فيها وتوعد بإنه يتغير وكذلك الرجل ، نختار الراجل اللى يعترف قبل الجواز بالوحش اللى فيه ، حاجة كده زى البياع اللى عنده ضمير و بيقولك بضاعتى معيوبة بكذا وبراحتك تشتريها ولا لأ فاللى زى ده نختاره وإحنا متطمنين لأنه على الأقل لو ماعرفش يتخلص بشكل نهائى من طبعه الحاد فهو على الأقل هايقدَّر صبر الزوجة عليه و هايحاول يخفف من صعوبة طباعه دى لأنه معترف بصعوبتها .

٣- نختار الشخص الحنيّن الشخص العطوف اللى لو حَب حُب عاطفى هايخليك تمسك النجوم بإيديك ولو ماحبش هايعاشرك بالمعروف وهايكفْ عنك أذاه وهايتقى الله فيك وضميره مش هايسمحله يظلمك حتى لو مش أنت الحبيب .

٤- خلينا نبعد كل البعد عن الشخص الأنانى سواء ست أو راجل ، تخيلوا معايا كده أم كل إهتمامها بجمالها وضوافرها وشكل جسمها وصحباتها ومشترياتها وناسية وسط الزحمة دى جوزها وأولادها وحقوقهم عليها ، تخيلوا أب كل حياته شغله وصحابه و خروجاته وسلامته النفسية وروقان باله ومزاجه لو كان مدخن أو مُتعاطى ، هايعمل أيه ده فى حقوق زوجته وأولاده وإلتزامات بيته ( بلاش الأنانى ياجماعة ).

٥- خلى بالك كمان من الشخص (الشكَّاى) الراجل اللى يروح لأمه وإخواته البنات ( إلحقوا دى عملت فيا كذا وكذا وطلبت منى كذا وكذا ) والستات برده اللى بتنقل لأمها وأختها صوت وصورة يوميات البيت ، الحاجات دى بتبان قبل الجواز عادى للى بيركز فى إختيار شريك حياته الصح فإحنا فى الأول نتفق مع بعض إن كل الأحداث إللى تعترض طريقنا ، نتعهد بحلها مع بعض دون تدخل أى طرف من الأطراف المحيطة واللى يخلّ بالشرط ده ويروح يحكى يبقى لايؤتمن على أسرار البيت و ده طبعًا من أهم أسباب فساد معظم الزيجات .

٦- إختار اللى ميوله ورغباته شبهك علشان يفهمك لما يصحى جواك طموح معين ، إختار فيه مرايتك اللى هاتشوف نفسك فيها ، اللى يوجهك ويشجعك ويسندك ويقولك سيبك منهم أنا شايفك هناك آخر الطريق وأنت ناجح ومميز ، وبلاش خالص الشخص المريض اللى يغير منك ويعتبر نجاحك تقليل من شأنه ، إختار اللى يفرح بنجاحك ويفهم إنه نجاح له هو كمان .

دى كانت بعض الأسس لأن الموضوع ده مالوش نهاية لأن النفس البشرية أعمق من أن تجد لها نموذج ثابت منتهى .