أفنيت من عمري شوية
سرحان جدًا وبفكر
إيه السر في إن أنا ليا
في الضحك ولسة مكشر
إيه يعني الداعي وليه
للحزن في قلبي وجود
وبيرقص حزني بليه
على چثثي بكل برود
وبحاول أخلص روحي
من وجعي بأي طريقة
فيقوم الضحك بنفسه
ومشعلل ألف حريقة
لمجرد إنِّي في مرة
ضحكت بدون ما احطات
أم قالي الحزن اتنيل
وبدأنا صويت وعياط
واخدني في حضنه يطبطب
علي وجعي و قال يا عبيط
ومسك في دماغي يخبط
ببجاحة في بوز الحيط
وقعد يضحك ويكركر
علي ثقتي الزايدة وفيه
ويقولي العمر مكشر
بالزمة ده يطلع إيه
ناس غيرك رغم وجعها
للضحك بتفتح باب
وكتير اللي يجمعها
تصنيف اسمه الأحباب
ف اختار من الناس واتخير
اللي هينفع ويسد
وقت الأوجاع من إيدك
ماسك بإيديه ويشد
ويصمم من أحزانك
ياخدك حالًا والآن
ويخش عليك بالفرحة
من غير حتي استإذان
فتقوم على حيلك تضحك
ما تحسش شئ مفقود
وتدوس على حزنك وقتي
وانت بترقص ببرود
وتقول للعالم أجمع
أنا عايش لسة ما موتش
وانت بتضحك وتدمع
علشان فعلًا موجود
