ورقة وقلم وأكتبيِ معايا ياست الكُل وصفات النهاردة بتعتمد علي الفراخ لأنها كل طريقة وهقولك تعمليها أزاي بطريقتي:-
“محشي الفلفل،والمكرونة بالفراخ بطريقة مبتكرة”
_المقادير:-
١-صدر فرخة يقطع قطع صغيرة
٢-رأس ثوم تُفرَم كاملة
٣-صلصة طماطم
٤-فلفل رومي أخضر
٥-مكرونة قلم أو أي نوع تُفضليه
٦-فلفل أسود
٧-نصف مُكَعب مَرق دجاج
٨-كزبرة ناشفة
٩-كاري
١٠-كُركُم
١١-كمون
١٢-بهارات مشكله
١٣-لمونتان يتم عَصرُهم وأخذ العصير
_الطريقة:-
أول حاجة في طاسة على النار هتحطي فيها شوية زيت، وبعد كده تنزلي بالتوم اللي هرستيه وتقلبيه تقليبتين وتنزلي عليه بصدور الفراخ المُقطَعة، وتقلبي وبعدها أنزلي بالبُهارات كلها المكتوبة فوق بالظبط.
ولو مش عايز تحطي نصف مكعب مرق أستبدليه بالملح، بس ماتخليهاش مملحة أوي حاجة بسيطة هتعرفي ليه دلوقتي
وبعدين سيبيها تستوي وبعد ماتستوي أنزلي عليها بعصير الليمون، وده عامل زي الدريسنج كده
قلبيها وأطفي عليها.
نيجي للجزء التاني هتحضري الصلصة:-
هتجيبي خمس حبات طماطم وتضربيهم في الخلاط وتعصريهم في مصفاة كويس، وبعدين هتحطي في حلة على النار معلقة سمن كبيرة ومعلقة زيت كبيرة. وبعدها تنزلي عليهم بالطماطم المعصورة، وتتبليها حلو “بفلفل, أسود, وملح, وكزبرة ناشفة, وكمون, وكبابة صيني مفرومة, وبهارات مشكله”
وممكن تحطي في الصلصة كزبرة خضراء بتبقي حلوة بيها جداً.
_وبعدها تسيبيها تتسبك يعني القوام بتاعها يتقل. وبعدها أقفلي عليها لما تتسبك خالص، وخدي منها معلقتين كُبار في طبق على جنب
_وابدأي هاتي الفلفل الرومي بعد ماغسلتيها، وأفتحيه وأحشيه بالفراخ، ورُصيه في حلة، وأبدأي انزلي عليه بمعلقتين الصلصة اللي خدتيهم على جنب، بحيث كل الفلفل يتشرب وبعدها هاتي كيس وحطيه فوق الحلة واقفلي الغطاء، والفلفل هيستوي بالبخار ماتقلقيش مش هيحتاج شوربة ولا الكلام ده.
_الفلفل هنا اختياري ممكن يبقي باذنجان وممكن يبقي بصل أو كُوسة أو أي حاجة بتحبيها.
_بس هنا الفلفل بيستوي بسُرعة وطعمه حلو…زي ماقولتلك السر في طريقة عمل الفراخ.
_أخيرًا نيجي بقى للمكرونة بعد ماسلقتيها نزليها في الصلصة وقلبيها، نزلي عليها باقي الفراخ وقلبيهم.
وبألف هنا على قلبك.
جربي الطريقة دي صدقيني مش هتعملي غيرها تاني.
