الذهب بيمر بفترة صعبة جداً، والمعدن الأصفر حالياً تحت ضغط هبوطي قوي دفع سعره للانخفاض في جلسات بداية الأسبوع. التوقعات الفترة اللي جاية مش مبشرة للمتداولين، والأنظار كلها متجهة نحو مستوى 4000 دولار. اللي لو انكسر، ممكن نشوف تراجعات أعمق توصلنا لمستويات 3900 وحتى 3800 دولار للأوقية. الحكاية إن ارتفاع أسعار النفط والتوترات الجيوسياسية في الشرق الأوسط. بدل ما تكون دافع لارتفاع الذهب كـ "ملاذ آمن"، بقت بتضغط عليه ليه؟ لأن ارتفاع الطاقة بيعزز توقعات الأسواق بأن الفيدرالي الأمريكي هيضطر يفضل "متشدد" في سياسته النقدية. يعني ممكن يرفع الفائدة أو يثبتها مرتفعة لفترة أطول عشان يسيطر على التضخم اللي بيغذيه ارتفاع أسعار الطاقة. السوق دلوقتي في حالة ترقب شديد لأحداث الأسبوع ده، وأهمها: بيانات مؤشر أسعار المستهلكين التضخم اللي هتصدر يوم الثلاثاء. شهادة رئيس الفيدرالي الأمريكي "كيفن وارش" أمام الكونجرس. بيانات أسعار المنتجين والمبيعات بالتجزئة. البيانات دي هي اللي هترسم الطريق وتحدد هل الدولار هيكمل قوته على حساب الذهب. ولا ممكن نشوف مفاجآت تقلب الموازين. فنياً، الذهب عجز عن تخطي مستوى 4100 دولار. ومع تزايد الزخم الهبوطي، بقى فيه خطر حقيقي لكسر مستوى الـ 4000 دولار لأسفل. خاصة إن الذهب في السنوات الأخيرة بقى بيتعامل كـ "أصل خطر" بيتأثر زي الأسهم، مش مجرد أداة تحوط تقليدية. هل في نظركم الذهب هيقدر يتماسك فوق الـ 4000 دولار مع البيانات اللي جاية. ولا بدأنا بالفعل رحلة الهبوط لمستويات الـ 3800؟
