شوية هجص وحيد علي الجمال تغيبي وترجعي تلومي عليكِ إزاي أنا ماسألش وتتغير ملامحك في تفاصيلك وتظهر زي وحش كبير وتصغر فجأة تاني تكش ولو مرة وكان العكس فردك يبقى ديما عكس تهديني على البارد كلامنا لازم يبقي ما بينا ريلاكس أنا ظروفي بعديها مع ظروفك وحاسس إن بينهم ميكس حقيقي زهقت من التبرير ومن عذري.. مابتعلّمش أنا خايف أقول كلمة ولو طلعت على لساني هتبقى كتير وما بترجعش ببان فيها كإني حمار بيفهم عني ولو ركزت ناديت الصبح إني بموت وصورت الخبر بالنعش دخلت في غرفة الإنعاش وقسمت الخصام بينا كدا بالنص ورغم العمر خد منا ولسه كتير فضل بينا وما اتصلحش وغبت ساعات مابتحركش فاضل في الكدبه كام كدبه، وخطوه كمان وتعمل تطش سمعت صحابي في الدفنة واحد بيقول للثاني هيوحشنا حقيقي كتير برغم أنه كان جحش ودمه تقيل وما بيفهمش كتير شكروا وناس شتموا وناس كانت توشوش ناس دَا ساب ثروه دا ساب بلوه دا عاش غلبان ومات كحيان ودينه لسه ما اتسددش وعنده كتير مايتقدرش ولما وصلت لنهايتي ضحكت كتير على خيبتي اللي مابتخلصش خدتني في ثانيه نوبة عطس سابوا الدفنه مع الميت رجعت البيت عشان ألحق ميعاد الماتش أنا المغلوب على أمري وكل نهايه تعجبني تضيع مني مابين ضحكه مهيش سالكه وبهتانه وهستريا وسخرية ونوبة عطس صاحب عمري وغيره كان ملازمني تشوفه تقول د كان ضلي وكله كله في الآخر شوية هجص