أنا والكلمة
بقلم: أمل أمين الخولي
وطول عمري وأنا بحلم
يكون لي بيت
في حضن سحاب
في قلب كتاب
وعشت العمر في خيالي
ومش بندم
وياما قاسيت
لا كان لي أصحاب
ولا أحباب
وكان قلبي كتير مخنوق
أصم ..أبكم
ماينطق صوت
ومداري ورا الأبواب
في قلب سراب
وعشت في عتمة جوايا
ظلام مُبهم
لكني رضيت
وبين الناس أنا وقلبي
عشنا أغراب
وعدى العمر ولا عمري
عملت حساب
يكون لي شبيه
ذكي ويفهم
وبعد ماعقلي بدا يغلب
ومن فكره ابتدى يتعب
لقيت في الحلم ألف شبيه
وبينادوا عليا جريت
ممر طويل أو يعني
كما السرداب
وآخره نور وألف كتاب
وناس بقلمها تتكلم
وبالكلمة أنا اتحبيت
وبِالكلمة أنا اتحسيت
بالكلِمة تلاقي أصحاب
بالكلمَة لُقى الأحباب
وَبالكلمة فرح وعذاب
بالكلمة هنبني قصور
بالكلمة نعدي بحور
وَالكلمَة جناح عصفور
وكان مبتور لكنه خلاص
رجع تاني وخرج للنور
