سلام الله

سلام الله

بقلم: منى أحمد إبراهيم

سلام الله على الشهدا
على الماشيين ع أرض زتون
حياتهم نهر دم يسيل
كسيل من مسك لترابهم
يغذي مهما يكتر يوم
عروق أقوى لأحفادهم

بطل يا ولدي
بطل يا ولدي من يومك
بطل ورفعت راياتك
شعار الظلم دام لسنين
واحنا الخرس مالكنا
شعارهم خنق.. قسوة وكبت
شعار للظلم والجبروت
وحكايتكم
نزيف سايل على الطرقات
حكاية حكاها الدرة من سنوات
قالتها الآهة من جوف أبوه
آهة قوية ضمتها
حنايا الصرخة جوة سكوت

سلام الله ي أقصانا
يا قبتنا يا رفعتنا
كرامتكم… كرامتنا
عروبتكم.. ورفعتنا
عروبة وشاحها رمز عريق لعفتنا
يمينها الحق وشمالها
حجارة بألف طلقة موت
عيون لمعتها ناسية الموت
وشاب شجاع
شرى بالآخرة دنيتنا

رأيت اليوم ف أفراحهم
عريس يتزف جثمانه
وبدلة عرسه قماشها نسيجه في علمهم
وأم بترفع الجبهة
تعيش مرفوعة ليها الراس
تقول أنا ابني فخر الدين
سليل جده صلاح الدين
دموعها وجع.. معاها يقين
بإن النصر جاي ف يوم
وزمن الظلم لو دام عمر
مسير الحق بعده يقوم

ترابك ماس يا أرض سلام
يا غصن أخضر ف تم حمام
ترابك غالي مهما داسوه برجليهم
واسمك عالي مهما عمونا بعنيهم
نقية وطاهرة يا أرضي
يا بلدي يا غالية يا قدسي

عناية الله هنا تحاوطك
كبيرة انتي يا أرض وعرض
وعالية مهما الكبر يوم خدهم
صغير فرحك لكن كبيرة بإيديهم
شباب من نار بتطلقها
بترشق جوة صدر جنود بلا أديان
عباد لسلاح ماليهم ملة
وجوفهم خاوي مليان ضعف
بيمشوا يبصوا حواليهم

جميلة انتِ
يا بلدي يا درة الأوطان
يا قبة من الدهب أصلك
شموخها رمز للأديان
ولجلك انتِ يا قدسي
كل الغالي يرخص لك
يهون العمر ف ترابك
تهون أوجاعنا
وأرواحنا فدا عذابك
شبابنا رهن لشبابك

سماكي العزة ضامة حدودك
وأرضك حاضنة أعتابك
والحرية
حرس أوتاده على بابك
سلام الله
سلام الله عليكي يا بلدي
يا غالية وعالية دايمًا فوق
إنتِ وكل أحبابك..