اللي بيتجاهلك قاصد
قال يعني علشان زعلان
اتجاهله ونفسك راضية
من غير ما تكون قلقان
كان أولى يناقشك حتى
ويقول زعلان من إيه
إنما ياخد على خاطره
من غير ما يقولك ليه
ويسيبك تضرب راسك
في الحيط وتجيب كراسك
وتفتش فيه على غلطة
صدقني الناس دي أساسًا
في حياتنا مجرد ورطة
إنما لو جالك عاتبك
فضفض لك وأنت سمعته
اعرف إنك م الآخر
أكبر خسران لو بعته
ده اللي اسمه عليك بقي باقي
مهما يحصل وشاريك
وإن ضاع منك في الباقي
ضيعت سند وشريك
ومرايا لصورك واضحة
توبة وحبات للسبحة
صورة للدنيا السمحة
وبيبان واسعة وشبابيك
اللي بيتجاهلك دائمًا
عمره ما يتسمي حبيب
واللي بيتمسك دائمًا آخر واحد بيسيب
وإن سابك حتى بيرجع
أول ما ودانه بتسمع إنك واقع وفي شدة
الناس دي بجد قلوبها
زي ما بيقولوا
حليــــب
