عفويات

عفويات

بقلم: عادل عوف

ما تسيبش روحي للظنون تتسلى بيا
وقولي مالك أنت عني مخبي إيه

قلبي حاسس أن فيك حاجة مش عادية
والبعد قرب منا ومداري عليه

امال ده إيه اللي أنت فيه ما هي مش طريقة
والنظرة دي مش نظرتك وما هيش بريئة
أنا بعرفك من قبل حتى ما تعرفك
كل الطرق في فن تزيـف الحقيقه

بتقول كلام له ألف معنى ومش صريح
يا حد كان الدغري في صدق الكلام
إزاي بقيت فجأة كدة ما منتش مريح
والشك أصبح مبدأك والكدب خام

امال ده إيه اللي أنت فيه ما هي مش طريقة

نظرة عينيك هي اللي دائمًا تكشفك
وبتحكي ليا
ومستحيل تخدعني يوم
كل كلمه تقولها كدب بتكسفك
و كل نظرة بتخدعك بعتاب ولوم

امال ده إيه اللي أنت فيه ماهى مش طريقة
والنظرة دي مش نظرتك وما هيش بريئة
دا أنا بعرفك من قبل حتى ما تعرفك
كل الطرق في فن تزييف الحقيقة