اللمة الكدابة
خواطر بالعامية
بقلم: دعاء الراجحي
اللمة الكدابة
بتجرح بزيادة
أما تلاقى ناس حواليك
وقت الفرح بتراضيك
وقت المصالح بتناديك
كله عايش فى أراضيك
كله بينفش الريش
وبجناحهم عايزين يحموك
دى بقى اللمة الكدابة
أما الهلومة تنفض
واما الفرح يتشال
والمعازيم تروح
محدش بيسألك وانت مروح
حتروح إزاي
ولا من فين
كله كان عامل فرحان
وكله كان معاك
كانه منك ومن دمك
وقت ما بتقع
أو أمت الجبل عليك يقع
مش بتلاقى حتى اللي
بيشيل التراب من حواليك
ولا بتلاقي حتى الل يمسك إديك
ولا حتى اللي بيحاول يشدك
ومن الوجع يضمك
ويقولك زي ما حضنتك وقت الفرح
أنا معاك فى الفرح والجرح
هى دي اللمة الكدابة
اللي بتخلص على ولا حاجة
كم من مية اتبقوا
صانوا العشرة
كم من مية اتبقوا
ما تعدش دول ميجوش حتى عشرة
طب ليه وقت العزوة
كنتم شايلين الخاطر والجميل
ووقت الضحكة ما كانت عالخد
انتو عروقكم بيجرى فيها ايه بجد
وقت الشدة ما كنتوش هنا
أو عاملين نفسكم هنا
بس كنتم بتراقبوا من بعيد
ياترى اللي اتهد حيتنبني من جديد
يمكن ينوبنا من الحب جانب
ونرجع من تانى حبايب
حابة اقولهم انتم اللمة الكدابة
اللي اما كنت ليهم محتاجة
ما لقتش منهم ولا حد
عشان انتم مش حقيقيين بجد
انتم كنتم مع الموجة
لو عالية وحتعلينا
احنا هنا ويلا بينا
ولو ظهرت الدوامة وحنغرق
بدل ما نشد فى بعضينا
ونطلع كلنا سوا
اتفرجتم من بعيد
وقلتم هل من مزيد
أحب اقولكم انكم لمة كدابة
فيه منكم الصادق
والوفي
ده على الراس
متشال
ومقامه عالي وحيفضل
دايمًا الغالي
وفيه منكم اللي كنا فاكرينه بعيد
طلع أقرب من أقرب قريب
اللمة الكدابة
بتجرى ورا أي حاجة
فيها مصلحتها
واما الدنيا بتغرق
أول ناس بتهرب
امسك في اللي شاريك
والأصيل
اللي بيشيل الجميل
وابعد عن اللمة الكدابة
اللي انت أصلًا عرفتهم
على حقيقتهم
خليهم فرحانين
باللي بيعملوه
انت أصلًا مش محتاجلهم
انت بس محتاج تميز
وتعرف مين بجد الكويس
اللمة الكدابة
وشوش بتضحك
بس من جواها
عايزة تكسر جواك
أي حاجة
المهم إنها تكون كسبانة
اللمة الكدابة
بتجرح وبتخون
وبتحسسك إن انت موهوم
وإنهم أحسن ناس في الكون
اوعى تصدق
ولا تآمن
إلا اللي المواقف كانت عليهم شاهد
حافظ على اللي فضلوا معاك
في وقت العاصفة
كانوا في ضهرك
مش بس شاورولك من الشباك
