إنت حقيقة ولا خيال

بقلم: هدى إسماعيل

إنت حقيقة ولَّا خيال؟!

1

إنت حقيقة ولا خيال؟!

أي طاقات من نور تهديني

راسم دربي منور عيني

شايل همي ومدفيني

دايما مادد إيدك ليا

دايما قلبك حاسس بيا

دايما حابب دايما فرحي

رافض ألمي رافض جرحي

دايما عايزني أكون منصورة

ولا أضعف ولا أكون مكسورة

إنت حقيقة ولا خيال؟!

إنت حقيقة بس جميلة

إنت حقيقية حلوة بريئة

إنت الطهر وأنت النور

وأنا جنبك بكون في أمان

حابب سعدي في كل أوان

إنت حقيقة ولا خيال؟!

دايما عايزني أعلِّي الهامة

وأعيش حبي بكل كرامة

دايما واقف ساند ظهري

دايما أنت بر أمان، حب حنان

مرسى نعيم، سعد مقيم

يا بخت القلب بحبك ليه

ليه معرفتكش أنا زمان

كان القلب ارتاح من همه

ولا كان حد جرحه وظلمه

هفضل أعيشلك كل سنيني

وأنت في قلبي يا نبض حنيني

ربي يصونك دايما ليا

يا فرح القلب ونور العين

إنت حقيقه ولا خيال؟!

2

تعالى يا قلبي نفرح شوية

تعالى يا قلبي نفرح شوية

تعالى نحلم بأيام حلوة جاية

تعالى ننسج الأحلام

بخيوط الشمس الذهبية

تعالى ننسى كل الحكايات الرمادية

تعالى نزرع الأمل

شجرة فروعها مندِّيَّة

تعالى نطير فوق السحاب

ونداعب نجمة مضوية

نجري ورا نسمة معدية

أو حتى ورا فراشة شقية

تعالى نرسم ع السما

قلوب الحب الوردية

تعالى نحلِّي الأيام

ونعيش الفرحه الأبدية

تعالى نروي بالشهد

طريق الأيام الجاية

تعالى نشاور ع الأحزان

بضحكة عالية مدوِّيَّة

يمكن ترحل أو تخجل من روحها شوية

تعالى نخلي الطير يشدو

بأغاني عذبة سحرية

تعالى نجمع الأزهار

ننثرها على جدول ميه

تعالى نعلم الأفراح

طريق أمانينا الجاية

تعالى يا قلبي نفرح شوية