![لو هتكلم أنا ع اللمة](https://aladadalawalnews.com/wp-content/uploads/2022/05/FB_IMG_1652866800902-780x470.jpg?v=1652867229)
“لو هتكلم أنا ع اللمة”
بقلم: محمد عبد العزيزرمضان
لو هتكلم أنا ع اللمة
أنا هتكلم عن حكاويها
قصة بابا وماما وجدو
هما حياتي كدا هحكيها
كنا بنصحى نقوم نتوضى
على صوت بيقول قوم صليها
اصحى يا نايم سيب التوهة
ولأشغالك روح أدّيها
كانت ماما بتعمل لقمة
حلوة هنيّة نفطر بيها
نسمع صوت الراديو يجلجل
وعلى الساعة نبص عليها
علشان كنا نخاف نتأخر
أصل ورانا حاجات ننهيها
كنا بنفرح من جوانا
مشاكلنا بسرعة نصفّيها
أصل قلوبنا كانت بيضا
بس خلاص الله يهديها
كل اللمة خلاص كدا ضاعت
حتى جراحنا مين يداويها
كله يقول مش عارف مالي
هم وحزن كتير يشكيها
طب ليه نشكي ممكن نقدر
نرجع تاني أحزان نطويها
نسأل كدا على كل احبابنا
ننسى اطماع وشرور نرميها
نفسي اللمة تعود من تاني
بس خلاص تاهت خطاويها