أدبي

نون النسوة

وقت النشر : 2022/11/27 10:10:45 PM

نون النسوة

بقلم: وحيد علي الجمال

وكل قصيدة بنشرها
بتسألني كاتبها لمين
أكيد يعني مهيش ليا
ولا مكتوبة في عينيا
ولو عددت أيمانك
على صدقك.. نقول مية
كلام الحب والحسرة
وليل البعد والكسرة
مهوش طالع كدا شيطاني
بدون همزة ولا لمزة ولا تنوين
ولا حتى مشاعر جرحها صاحي
ومحتاجة كمان تسكين
ونون النسوة شيفاها
على برج الكلام عندك
دي تبقى لمين
بتبكي كتير على ماضي
مانيش عارفاه ولا حساه
لكن شايفاه بيشغل كل أوقاتك
وناره قيده في جبينك
وشاردة فيك تفاسيرك
ومش واخدين ولا حيز
في تفكيرك
غيابك طال وانا جنبك
مفيش حاجز بيني وبينك
ملوش معنى تعيش بينّا
وطبعك حالُه جننا
مالوش معنى أشوف قلبي
على حزنك صبح شايب
مالوش معنى
يكون حال الهوى بينّا
وحبله من الظنون دايب
وم الآخر مايشغلنيش
ولايحرك عليك غيرتي
لكن شوفت الخيال
مرسوم على حيطاني
وموج الشك بيخبط
وبيخبط في وجداني
بيحكي قصتك انت
مع غيري.. وليه غيري؟!
وانا جنبك بقدملك
فروض طاعتك مع حبي
ومين غيري هيسمحلك
ويشفعلك
ويغفرلك ذنوبك مين؟
وهيسامحك وهيصالحك
وهيكَدِّب كمان ظني
ماتزعلشي بقى مني
إذا عقلي هرب سابني
وثارت فيك رياح غيرتي
هترجع تاني وتفتش
على قلبك
تشوف غيرها في تكوينك
تخاف جداً من الفرقة
لكن بردو الهوى دينك

نون النسوةبقلم: وحيد علي الجمال
نون النسوة
بقلم: وحيد علي الجمال

زر الذهاب إلى الأعلى