حرف علة وحرف ساكن

فاكرة ولا العمر عدى

واللي بينا نون وشَدَّة

حبنا مشدود بشِدِّة

الكسور مش مستحبة

كنت فاعل جاتله نكبة

راح عاملي ألف جلطة

جم شالوني جوة خضة

والطحين بقى نُصه ردة

فاكرة يعنى لما تمشي

راح يحطوا جوة قلبي

نار وشطة؟!

اكدبي ميت ألف كدبة

واعملي م الحبة قبة

اللي بينا راح أونطة

واللي قبلي شال له شنطة

عدى بيها كام محطة

قلبي كان ماشي في غاغة

تقولشي كان رايح مغاغة

ولا كان هربان بجرحُه

الدموع كانت في طرحُه

شَد أستيكة ومحاها

نفسي مني أستخبى

وانسى غدره حبة حبة

حظي مال ويا الأحبة

قلبي كان فرحان بقربه

كان يوماتي يجيب ف سيرته

البيوت كانت تحبه

لما يحكي عن حبيبته

فجأة غابت من حياته

والبعاد زلزل سكاته

حد يعرف ليه حبيبته

جت وسافرت مرة واحدة

م الدفاتر

إوعى تحلف.. خُد لي ساتر

إقرا تعويذة العساكر

إنت حامد ابن شاكر

والأماكن اللي بينا

هو ديما فيها راكن

شكل داكن فيه مشاكل

واللي مكتوب في القصيدة

بعد بَعْدُه، وبعد منه

حرف علة وحرف ساكن

إمشى يلّا قلبي ضامن

إوعى تاكل ف الأنامل

راح يكون البعد شامل

حق جرحك يبقى كامل

مهما تبعد..

لسة بينّا كام علامة

هات لي قلبي

ويلّا فارق بالسلامة