“بقول الشِّعر”
بقلم: جمال زكي عينر
بقول الشِّعر
واتوضَّى ف تراب أرضه
أنا بهواه
وَأدِّي نوافلُه مع فرضُه
ده شِعرى هُوَّ رِسمالي
وِهُوَّ دنيتي ومالي
ولو فرحان ولو زعلان
بيوصف كل أحوالي
بأشعاري بَحِسّ واعيش
لا انا مجذوب ولا درويش
ومش بمشي مع التيار
ولا عايش في لهو وطيش
أنا بالحرف والكلمة
بكون إنسان
بَحِسّ بعزم وبهِمة
ولو حيران
بلاقي الضحكة والبسمة
في قلب ديوان
مع الأشعار
بشوف قمري مع نجومه
وبدعي ربنا يدوموا
واغني ف ليلي كام موال
وبنسى الغلب وهمومه
بقول أشعار
عشان انسى
حياة قاسية وما بتنسى
تعذب فيَّا ليل ونهار
تشتت حرفي والأفكار
لكن والله لا اغلبها
ولو مقفولة هواربها
وهَجرِي وراها بالمشوار
وكل ما اواجِه الأخطار
أقول أشعار
كل ما اواجه الأخطار
أقول أشعار
