مولانا الشاعر

مولانا الشاعر
ماتقلقشي يا مولانا وسيدنا

زكاة الحسن مش مكتوبة لجنابك

وَلا محجوزة لحسابك

ولَا من قلب حُسَّادَك

وَلا مفروضة في كتابك

وكيف الحسن هيعشش

على بيوتنا

ويشبه شكل سحنتنا

ويقتل فينا غربتنا

تجاعيد الزمن واقفة

تفتِّش في ملامحنا

وحجِّبنا الكلام بينا

وصَوِّمنا مشاعرنا

وعشت كتير في أحضانها

وانا محروم

زكاة الحسن مش معروف لها معروف

ولا فيها ثواب معروف

ومذهبنا مهوش جايب تفاصيلها

زكاة الحسن ناس تانية بتدفعها

ولو فاضت وبزيادة

توزع منها ع السادة

ونشحت منها كام حاجة

تجرَّحنا وتدبحنا

ونبكي كتير على حالنا

واذا ف مرة على سهوة

قابلت الحسن في عينيها

فسيبُه يعدي بالمرة ماتشغلهوش

وكَدِّب عينك الحلوة

وأكِّد في اليمين انك متعرفهوش

تلات ارباع زكاة الحسن بياخدها

اللي عمره ف مرة ماطلبها

ولا احتاجها

وكام حسنة يوزعها

ويحلم أنه جَمَّعها

ونام الليل يغنيها

زكاة الحسن دي صدقة

ساعات تدخل كدا سرقة

وتشبه كُحة الشَرقة

ولو كلمة بلا حكمة.. تِهَدِّيهَا

ولو دخلت عليك فجأة

هتغرق في حواريها

زكاة الحسن ياسيدنا

أنا في السر بطلبها

وبين الناس بحَرَّمها

ولو في الحق تسألني

وجوبها في الهوى شرعي

ولو كانت على حقي

ومن حقي.. هأديها