بلاش تهريج
بقلم: وحيد علي الجمال
مشغول بهموم الناس يا وحيد
وكأن الخوف مابقاش جواك
واتحول قلبك كله حديد
فجأة اتجرأت.. بسرعة نطقت
وكتبت الشعر بشكل جديد
من إمتى بقيت في العشق مريد
من إمتى بقيت في الهم شريك
اكتب في الحب بلاش تهريج
اطلع م اللون ده الله يخليك
طول عمر الدنيا بتضحك ليك
وساعات وكتير بتعاند فيك
صبرك على قدك بيكفيك
إخلاصك بالصدق هيرضيك
حافظ على بعضك ووجودك
على بعض الدنيا ما تسوى مداس
قلبك في الأصل ده كله إزاز
مهما تعكّره أبيض شفاف
إوعاك تكسره قلبك ألماظ
راجع بتخبط في الكراكيب
وعاملّي مناضل م الحرافيش
إوعاك صدقت ان انت أديب
وهتكتب شعر بشكل مريب
وكمان هترد بشكل ظريف
وتبان في الصورة ان انت ملاك
ونضيف وشريف وزيادة.. عفيف
ولا كنت شريكهم ف التخاريف
ولا كنت ساعتها بشكل مخيف
ولا عمرك مرة مشيت ع الحيط
من إمتى الناس كانوا في بالك؟
بالعافية بنعرف أخبارك
حتى عيالك مش في حسابك
هيّجت النمل مع الصراصير
وكأنك في الضلمة مخاوي
ومصاحب قورطة من العفاريت
أجمل حاجة إن انت تعيش
في الدنيا كأنك حد عبيط
بقلم: وحيد علي الجمال
