أدبي

جوّة الصورة

وقت النشر : 2022/11/21 07:37:25 PM

جوّة الصورة

بقلم: وحيد علي الجمال

جوّة الصورة…
روح منحوتة
على جدران برواز مكسور
حبة دمع بلون الدم
لسة خيالهم فوق السور
حرف اتمرد لما كتبته
بيني وبينك كان مستور
كعبل كل حياتي بحالها
لما رفضني كان مجنون
شق لجرح بيحلم ينفض
آخر وجع انا كنت بدرته
قبل ما يطلع فجر النور
جوة الصورة…
خاتم صدّق
كل كلام الحب ما بينا
قبل ما يدخل باب الجنة
بتروا الحلم وعاش مهجور
جوة الصورة حكاية غريبة
لاتنين قسموا الضلمة ما بينهم
واتشعلقوا في حبال النور
صرخة كبيرة وخضة روح
هي رسالة بتيجي في لحظة
تسرق كل حيطان الخوف
وحي بيسكن جوة مشاعري
بس حقيقي مش مفهوم
لغة من عالم تاني حاسسها
لها تفسير ساكن في خيالي
زي كابوس نايم مقتول
أنا مش يوسف
بس انا عشت العمر في بعدك
ليل مهزوم
أنا مش يوسف
بس السحر في قلب قميصي
كان ملعون
جوة الصورة…
توتة وجامع
وحروف علة رافضة الشدة
والتنوين
رافضة تنام ويّا التسكين
جوّة الصورة…
سرداب رابط بيني وبينك
مع تعويذة في كهف الموت
حافظة تاريخنا
واللي ما بينا
جذور ممدودة
مهما بعدنا بترجعنا
من غير حتى
ما يطلع صوت
اكتبي آخر جملة ما بينا
لو ما رجعتش تاني لحضنك
يبقى مصيري هو الموت

جوة الصورةبقلم: وحيد علي الجمال
جوة الصورة
بقلم: وحيد علي الجمال

شاهد أيضاً
إغلاق
زر الذهاب إلى الأعلى