أبيض أسود ورمادي
بقلم: وحيد علي الجمال
أبيض أسود ورمادي
أنا أبسط إنسان هتقابله
بيقضي حياته كدا عادي
لا ببص لغيري واتمنى
ولا باحقد أبدا واتشفّى
والقرش في إيدي بيوجعني
مصروف ولا يدخل حصالة
أنا باكل مِشّ من الزلعة
واتعشى باتيه ويّا زبادي
وكرسبي فراخ مع نجرسكو
والكفتة من عند الحاتي
وصوابع محشي ما اقولكشي
والعدس بصارة مع نابت
أنا خِلف خلاف كدة وباعاند
أنا عمري ما ازعق في ولادي
في الأصل حاسسهم أصحابي
وصعيدي في طبعي و بنداري
وبناتي عينية وحياتي
والواد متربي على الهادي
والشعر في حكم اللي حاببها
في الأصل وذاته كلام فاضي
متدين جدا وفلاتي
كلامنجي وبس ماتتخضش
ما تروحشي بعيد ولا تتصور
باحكيلك عن وقت شبابي
باتوضى كتير انا من ذنبي
وبدمعي انا بغسل كدة روحي
ما باحبّش اطوّل أحزاني
وملامحي كلها على وشي
الخالق الناطق كدة أمي
ماهي توأم روحي وأفعالي
لو حتى غلطت كدة في حقي
راح اطيّب خاطرك و هاسامحك
من غير ما تقدم أعذارك
ماهي فترة وكلنا هنروّح
ليه نزعل بس ونتخاصم
على دنيا ماتسواش أبدا
خالص تتساوى
بنعلك ومداسك
بقلم: وحيد علي الجمال
