روحي فيكي

روحي فيكي

بقلم: وحيد علي الجمال

فسري الحلم اللي بينا
وابعتي ليوسف عليه
وإن ماردش يوم عليكِ
عند سجنه واسأليه
ليه بشوفِك جوه منه
فارده إيدك فوق عينيه
رافضة حتى أعرف دا إيه
قلت يمكن صعب أشوفك
رحت أدور في الطلاسم
في الرسايل
عن دليل واضح ما بينا
أمشي وأوصل من عليه
كل ده و أنتِ شَايفه
نفس حلمي وحَاسه بيه
تيجي قبضة خانقة صدري
تقلب الحلم لكابوس
بعرف إن المحنة جامدة
بجري و أبكي كتير عليكِ
شيء غريب شيء عجيب
هو إيه رابط ما بينا
غير سراب
حتى جرح العمر بينا
صار تراب
كل حاجة بينا راحت
إلا روحي لسه مرسومة
في عينيكِ
لسه عايشة بين إيديكِ
وحي بينا شايفه نازل
بالقصايد كلها مكتوبة فيكِ
وإن لمحتك مرة ماشية
جنب مني
ضِلنا في الأصل واحد
بس عايش جوه مني
و جوه فيكِ
لما طال الحب بينا
راح طاردني زي سحر
مسه فيه
وصابني بيكِ
يبقى حل السحر زار
واطفي بينا أي نار
زاد في بعدك والمرار
كل واحد راح لحاله
إلا حاجة لسه ربطاني بروحك
عايشه فيَّا
وساكنة فيكِ