![الشعر حلال بقلم: وحيد علي الجمال](https://aladadalawalnews.com/wp-content/uploads/2022/12/FB_IMG_1672262369447-538x470.jpg?v=1672262441)
الشعر حلال
بقلم: وحيد علي الجمال
حرام الشعر يا اهل الشعر
ولا حلال؟!
يوماتي اصحى مع مراتي
على موال
بإن الشعر وكتابته
دا يبقى حرام
غواية وفسق م الآخر
دليل واضح من القرآن
مافيهشي جدال
غلبت اشرح وافهمها
بإن الآية تفسيرها
ماهوش لازم يكون
حرفي كما فهمتي
دا فيه أسباب
لازم نعرف في مين نزلت
وإيه الحكمة م التنزيل
وإن الآية كات تقصد
بإن الكذب في الشعرا
دليل واضح على نفاقهم
زمان الآية تقصدهم
ماهوش يعني على التعميم
وفيه أصلا بقى استثنا
على المطلق وشرط أكيد
بإن الشاعر المؤمن
ماهوش منهم
ولو حتى وسلمنا على فهمك
بإنه صحيح
ف ربك حط في الآية
لهم أوصاف عشان احكم
إن انا منهم
لازم تظهر وتتحقق
وتبقى أكيد
رسول الله قِبِل منهم
وقرّبهم وحارب بعض أعدائه
بنظم الشعر يسحرهم
قصايد سيف بتقتلهم
وبتغيظهم وتبهرهم
وتوصف حب أصحابه
لدين الحق وكتابه
فتخرج تاني وتقولّي
وهوة الحب في الأشعار
دا يبقى جهاد
فاقف ساكت ومتعجب
دا بيت القصد والمعنى
حرام الحب في قصيدة
وتتغزّل في محبوبة
وتوصف شكل لعنيها
تقول عنها وتشجيها
يرددها كدا غيرها
ومعنى يفسره معنى
وتدخل جملة اللعنة
وممكن تاني تسمعها
فتخطف قلب أحلامي
وهوة الشعر إيه يعني
غير المكتوب في وجداني
وإحساسي
وحالة باوصِفك فيها
واخلي الليل يغنيها
ويعشق كحل معانيها
وغيرها بالعن الظالم
وابان عنده كدا مسالم
بدون تفسير ولا تحديد
ياخدها غيري يفهمها
بمعنى جديد
ورمز القصد في رسالة
لكل لبيب بيفهمها
ويحفظها بدون تشويش
ومعناها وتأويلها
على التشويق
وبطن الشعر للشاعر
دا بير أصلا وقعره
غميق مالهشي حدود
حرام الشعر يا اهل الشعر
ولّا حلال؟!
ومين يفتي على حبي
بإنه حرام
فترجع تاني وتقولّي
أنا اتلخبطت صدقني
ومش قادرة أفسرني
وصاحباتي عليك دايما
بتحسدني
على إنك بقى شاعر
وعشقي فيك بقى واعر
وانا في جنة من الآخر
ومع نفسي بامصمص غيظي
بشفايفي
واقول ع القهر حاسدينّي
واخبي الدمع في النني
وصمته في وشي يحولني
يقولّي كلام يفرحني
وقلبه جنة تحضني
وجوّة الشعر يتمخطر
بأوهامه وأوجاعي
ويعمل فيلم متصور
مالهشي أفيش
باكلم نفسي من خيبتي
دا جوزي مخاوي كام جني
وعايشة معاه كما الدرويش
يحب يصوم مع ديوانه
ويفطر جوة أحزانه
مع الحرافيش
وانا بسأل كدا تاني
حرام الشعر يا اهل الشعر
ولا حلال؟!
![الشعر حلالبقلم: وحيد علي الجمال](https://aladadalawalnews.com/wp-content/uploads/2022/12/FB_IMG_1672262369447-199x300.jpg)
بقلم: وحيد علي الجمال