كتبت: مرفت عبد القادر
كنت بستغرب ليه الناس بتفارق بعد العشرة والسنين والحب..
بتروح فين الغلاوة والمعزة؟
إمتى الصبر بينفذ والنفس بتطلب الخلاص؟
إمتى مبنقدرش نغفر ونسامح؟
صدقت مقولة زمان مراية الحب عامية، بتلغي العقل وبصيرته ونوره…
طب إمتى العقل بيسيطر تاني ونوره يرجع ويقدر يستوعب إن قلبه حدفه في دوامة الخداع؟
ياترى هو جه في يوم وليلة وضربت في دماغه أنا لازم أبعد؟ لازم أتخلى!
ولا سنين ومواقف كان بيجدف علشان يطلع من دوامة التيه اللي قلبه رماه فيها؟؟
إيه اللي يوصلنا نرجع أغراب؟
إيه اللي يهدم الود؟ ويبني الحواجز ويكبر الفجوة؟
الحقيقة إن القلب صبر، والعقل تعب من علاقات ومواقف كتير ماينفعش كان يعديها ويفوتها…
حاجات وجعتنا ووجعت غيرنا أخدنا بالنا منها ألف مرة وبرضه بنكررها في حق بعض..
اللي هو من آمن العقاب أساء الأدب🥺
العلاقات اللي فيها قلة قيمة ، وكسر خاطر وعشم مش في مكانه..
الحب اللي اخترناه غلط لشكل أو لمنصب أو لعشرة ..
الكدب والتمثيل لمجرد إننا نبان ولاد اصول.. الحب والكدب مبيجتمعوش…
فقدان الثقة وضياع الامان..
الأعذار الكاذبة والوعود الزائفة..
رد المعروف بالإساءة..
التظاهر بالرضا والسعادة المزيفين، المؤقتين.
ضعفنا وعنادنا وخوفنا من الشماتة وكلام الناس ….
الصحوبية المزيفة اللي بتنتهي لما المصالح تنتهي، أو حد جديد يدخل حياتنا.
لما مصالحنا تتعارض مع بعض ونتنافس علي الدنيا…
مش دايمًا الصبر بيوصلنا للسلام النفسي أكتر من مابيوصلنا للتعب النفسي يؤذينا ويؤذي غيرنا…
كل ده هنكتشفه لما الحقيقة توضح والعقل يرجع له بصيرته
وقتها هتتلاشي العشرة والسنين مع المواقف والصعوبات وساعتها بنقدر نقول THE END🥀
.
