أدبي

لسه القهوة ع البوتاجاز

وقت النشر : 2023/02/27 09:33:31 AM

بقلم: أحمد ياسين

صباح الخير
صحيح الفجر لسه ما قالشي
لكن عرفاني من بدري
ب أقوم قبل الآذان يمكن
و قبل ما تبدأ التواشيح
أقلب في الكُتب وأقرأ
وأحضر كنكة القهوة
وأفضل أكركب على الفاضي
وأبوظ ترتيبات يومي
وأنعكش في الصور وأجمع
بواقي فاضلة في هدومي
وأقلب حبًا في التلفاز
وأحط القهوة ع البوتاجاز
وأرجع تاني لقديمُه
أحط أرقامي في النوتة
وأفك النجفة من الأوضه
وأغير لمبة الصالة
وأخلي الكنبة حصالة
وأرصص كتبي من تاني
في نفس الصف
وأغير عقرب الساعة
عشان بيركن ساعات في اللف
وأصلح عجلة الكرسي
وأركب فيشه للكبا
وأفكر نفسي بحكاية
عشان تشغلني لو حبة
وأخيط فتحة في ستارة
وأطلع غلطة في التطريز
وألمع جزء في الحيطة
وأغير حطة البراويز
بقيت بعمل حاجات يمكن
تبان عادي لكن هامة
بقيت وكأني للأشياء
ملكية عامة
ومش مدرك عن الحاصل
بقيت درامي والمشهد بدون فاصل
أبص لنفسي في مرايا
ألاقي وشي شكله كئيب
و ألاقي الوحدة قتلاني
مع أني معاشر الكراكيب
فيرهقني التعب وأسرح
وعيني يراودها النوم
وأحلم بيكي كالعادة
واشوفك في السما نجوم
و أديني صحيت
ولا اتوضيت ولا صليت
وزي يوماتي بكتب لك وما ابعتهاش
بخبي رسايلي دلوقتي جوه شاشة إزاز
و أديني لسه كالعادة أنام وأصحى
وناسي القهوة على البوتاجاز

اقرأ أيضًا: ليلاً طويل

              من 👈 هنا 

زر الذهاب إلى الأعلى