مقالات متنوعة

عفويات

وقت النشر : 2023/09/09 10:11:23 PM

عفويات

بقلم/ عادل عوف

اللي يقرر يسيبك ساعده وشجعه
واسحب من إيده إيدك من غير ما تودعه

وإن حس فـ يوم بندمه قوله دا زي عدمه
واضحك في وشه وامشي من غير ماترجعه

خسارته بتبقىٰ مكسب من أول دقيقة
والبُعد عنه أنسب لبلوغ الحقيقة

خصوصًا لما يبعد في عز ما انت عايز
وياك ناس بتسند وقلوبها تكون بريئة

خروجه من حياتك فرصة ونولتها
ما كنتش بيها تحلم خصوصًا وقتها

لما كانت مشاعره في حالة ارتباك
وكل لحظة حلوة يقوم بوأدها

بكرة لما تهدىٰ وتحس بـانتصارك
علي اللي كان مراهن ينجح بانكسارك

هتعرف أد إيه وإمتىٰ وفين وليه
ربك لما حبك ما أيدش اختيارك

زر الذهاب إلى الأعلى