عفويات

عفويات

بقلم:عادل عوف

من وحي اللي بيحصل لي
كان صدفة أو تخطيط
إن أنا كدة يوم ما اوصلِّي
أنزل رزع وتخبيط
على صدري واقولي يا قاسي
يا ظالمني بشكل أساسي
حجمك مش هو مقاسي
ولا صيتي ده نفس الصيت
يا هاجرني بقالك مدة
مع اننا عمر أصحاب
شاغل راسك بالمادة
ومحطم لي الأعصاب
كان مالنا يا عم ما كنا
رايقين وما كانش وجودنا
لو روحنا هناك أو عودنا
يجعلنا اتنين أغراب
دلوقت أنا وحدي في وادي
وانت في وادي ومشغول
ودا شئ طبعًا مش عادي
عن هذا انت المسؤول
دا أنا كنت أقعد لساعات
أحكيلك أو افضفض لك
وانت تجيني بحكايات
كنت اكنسها و انفضلك
لكن بعد ما نتحاور
نرسي أنا وأنت في بر
وأقول رأيي ونتشاور
والخير يركب علىٰ الشر
نضحك ولا جوز مجانين
علىٰ إن الدنيا دروس
وعلشان هنبان جادين
نحضن بعضنا و نبوس
مع إن الناس بلالين
وآخرها
يادوب
دبوس