زجل عنتر ابن ابن ابن ابن شداد بقلم: عادل عوف كفكف دموعك عنتره صوت بُكاك للمشتري واجمد كده وخليك جدع ده الحزن باص للمقبرة كفكف دموعك عنتره وبلاش بواخة ومسخرة عبلة من بعد الفراق في عينيها حطت مسكره عبلة من بعد الدمع فقدت أملها في الرجوع وكل ما تأكل تجوع وتشوفها كورة مدورة ما لقيتش قادرة على النهوض م الكرش أو تقل النهود مصيبة لو قالت نعود هتعود يا زحف يا جرجرة كفكف دموعك يا بو عبس عبلة لابسة التهمة لبس لو آخدة شهر بحاله حبس لا فيه زعل ولا حرحره عبلة من بعد الفحوص لقوها زايدة في الفصوص وغيرها يا دوب بس بوص وله عيون و حنجرة كفكف دموعك وانت ليه يعني عبلة زايدة إيه زي غيرها في كل حاجة وحاطه عينها على الجنيه وانت شقيان بيه شقي يساوي حبل المشنقة وهي شمس مشقشقة من حرها هتسيح يا بيه
