عفويات

عفويات

بقلم: عادل عوف

أنا حد مكركب من جوا
ومحتاج ترتيب
وبشوفني بقول إن أنا هو
أو حد غريب
كركبة من غير مقصد ” جايز ”
درج الإحباط كله جوايز
وعلى الجدران سورة الفرقان
وسريرى عليه نهر لذايذ
الضلمة وصوت حشرجة ومقام
ودبحت الصمت بغنى وكلام
طاير جوايا أنا سرب حمام
والسما بتضم كفوفها عليه
سراديب وكهوف
تماثيل ورفوف
كل ده م الخوف
ولا ده معروف معمول فيا
أنا زي ما قالوا الألآتية
بأبدأ بالدو
وانتهي بالدور
أنا أول حد يغني نشاز
وأساتذة فن
يقولوا سيبوه
أنا أول عاشق عِشق التوه
وعمله بحور
من عضم الحور بيبني مراكب
أنا راكب
عقلي بقالي زمان
وتعبت نزلت لوحدي مشيت
أنا أول ضحكه اضحكها
بكيت

أنا أول طوبة
في جدار البيت
أنا موت زمان ولا مئة مرة
لكن من نظره رجعت صحيت
أنا يخرب بيت
قلبي يا شيخة
جامد من برة وبيقرمش
لكن قدام عينك خيخة

بيتحول مضرب في إيدكي
ويطيح في الكل
ومطرح مايطول يحصد ويجيب
فتحول أوضة بميت سرداب
مليانة لحد السقف كمان
خردة وكراكيب