عفويات

عفويات

بقلم: عادل عوف

حسب التركيبة المعتادة
بعد الأحزان تيجي سعادة
واهو عدى الوقت سنين وايام
والقهوة بتتقدم سادة
ومافيش لليوم أي إشارة
ولا حتى بوادر لبشارة
والعالم كله واقف مكبي
بسجارة يولع في سجارة
رتب أشياءك يا أخينا
شوف ممكن تاخد إيه وياك
هنسافر علي ضهر سفينة
من مينا بتتحرك جواك
أمِّن على الهاتف وجوازك
واستلهم شِعرك ومجازك

وإن سألوك في إيه كان إنجازك
احكلهم إنك مايئستش
وإنك ماقدرتش تستسلم
وبتضحك عادي و بتسلم
وإنها لو فرضًا هتضلم
فبتحلم لسه ما بطلتش