حلم متعلق في أنبوبة_محمد حشيش

حلم متعلق في أنبوبة

بقلم: محمد حشيش

أم بتسعى بأمل وبخطوة محسوبة
نفسها تكون أحلى بنوتة
فجأة انضرب الأمل بأنبوبة
وبقت البنت منكوبة
صرخت وهز الصراخ المدى
جريت بصرخة مكتومة
وحلمها اتعلق بأنبوبة
سقطت من بلكونة مشؤومة
استكترت عليها الأمان في حضن أمها
واترمت على الأرض مفزوعة
قالوا هنساعد متأسفين
وجريوا بلهفة مكذوبة
زي التعالب والذئاب
وخبوا علينا حالة بنتنا
وقالوا دي طفلة معيوبة
احنا مالنا وما لِينا ذنب
ودي حاجة مكتوبة
المهم نحمي أُمنا ونفسنا
وهي دي الحدوتة
هي الناس جرالها ايه
باعو الجيرة والجدعنة
وخلوها أكذوبة
قسما برب السماء
ليكونوا عبرة مرئية ومسموعة
ليه إلاهمال طال حياتنا
وعشش فيها بطريقة مشؤومة
ما شافوش أبوها ولهفته
وسعيه ف دنيا أحوالها مقلوبة
تنزل دموعة لما بنته وأمها
من الحيرة والحسرة مقهورة
طول عمرنا ولاد أصول
وسيرتنا في البلد محمودة
بنحب الخير لغيرنا
واتربينا على عزة النفس
وبنخلي المايلة معدولة
قالوا القضية خسرانة
عشان الناس دي مسنودة
ربي هو السند لكل العالمين
وإن كان موازينها مقلوبة