مصرع طفلة بلدغة ثعبان بالشرقية: ثالث حالة في أيام وسط مطالبات بالتدخل

الحكاية باختصار إن حالة من القلق والحزن بتسيطر على أهالي محافظة الشرقية.

بعد ما لقيت الطفلة “ملك عصام” 11 سنة  مصرعها نتيجة لدغة ثعبان في قرية كفر حسين الطوبجي بمركز منيا القمح.

الحادثة دي مش الأولى، دي التالتة خلال أيام قليلة في نفس المركز.

بعد ما توفت سيدة وطفل قبلها في قرية القراقرة بسبب نفس السبب.

وده اللي خلى الأهالي يطالبوا بضرورة تدخل سريع من الجهات المعنية.

مع ارتفاع درجات الحرارة، بدأت الزواحف تظهر بشكل أكبر في المناطق الزراعية والمصارف .

والوضع دلوقتي بيحتاج خطة واضحة ومكثفة لتمشيط الأراضي الزراعية وتطهير الترع والمصارف لحماية الناس.

الأهالي بيعيشوا حالة من الخوف المستمر، خصوصاً مع تكرار الحوادث دي اللي بتهدد حياة الأطفال والكبار في القرى الزراعية.

الأجهزة الأمنية بدأت تاخد إجراءاتها ونقلت الجثمان للمستشفى.

والنيابة العامة بتباشر التحقيقات للوقوف على ملابسات الواقعة.

لكن المطالب الشعبية واضحة بضرورة التحرك قبل ما نشوف ضحايا جدد في ظل موسم الحر ده.

ربنا يصبر أهل الطفلة، ونتمنى نشوف تحرك عاجل من المسؤولين لحماية المواطنين في المناطق الأكثر عرضة للخطر.