عفويات “القهوة”

عفويات “القهوة”

بقلم: عادل عوف

كل يوم تفتح قهوة جنب القهوة
في شارعنا بقي خمسين قهوة

واسمها كافيهات
وكل مرة وعلى سهوة
تلقى القهوة على قلب واحد

لو عدت قدامها بنات
اللي يصفر ويلقح بكلام وحديت
واللي يبص ويتنح ويعملي غويط
واللي يقوم ياخد مطرح على ناصية بيت
علشان يسجل ويترَّخ
وعينيه سيديهات

وخلق قاعدة وبتشيت مع خلق بعيد
وناس بتضحك وبتقلش
على حد مجاش
وناس بتشكي من القاعدة على كرسي جريد
تقوم تجيب واحد غيره بس ما تلقاش

واللي مأنتخ من بدري سارح وشريد
واللي معاه صُحبة ولسه للحظة وحيد
ولسه حاله على قديمة وما فيهش جديد
وياما حاول وقالوا له وهو مخلاش

وحلو قاعد ومَّدِّد وفاتح صدره
وبيحكي في نوادر جامدة لصحاب قاعدين
م الضحك واقع كام واحد
واتنين يجروا
تقول عليهم م الآخر شلة مجانين

واتنين تلاتة بيتعشوا وطالبينك شاي
دخل عليهم واد رابع كان قال مش جاي
جايب في إيده ولد خامس لكن رغاي
قالوا له 100 مرة اخلفنا محناش ناقصين
والسهرة عدت يتعاتبوا في زمان والوقت
مع شاي وقهوة وسجاير تقريبًا فرط
وكل واحد يقولوله انت اتغيرت
يفضل يدافع عن نفسه في حدود ساعتين
القصد قاموا وكان فيهم واحد
بيشوط
بيسب ويلعن ويزعق وما هوش مبسوط
وقال كلامكم والله كدب ومغلوط
وعلشان افهمكم قصدي محتاج شهرين

نهار يفوت والليل يدخل في قيام وجلوس
والقهوة تفضى وتتعبى في قصص ودروس
فتلاقي ناس تفضل خايفة على زعل الناس
وناس لا ليها عزيز فعلًا ع الناس بتدوس

القهوة دنيا وعايشينها وكلها تفاصيل
فيها المِرافق والخاين وابو دم تقيل
واللي في الشدة يضحي دا لإنه أصيل
وتملِّي بيقاسمك رزقه لو عيش وغموس