جرّب إحساس
بقلم: رويدا عبد الحي
جرَّب إحساس
تكتم إحساسك
هيحصل لك إيه؟!
والناس حواليك
ولا حاسين بيك
ولا هامم حد
جواك إيه!
مفرمة شغالة
تقلب أحاسيسك
وأنت يا ولداه
مش قادر تصرخ وتبين
ليقولوا ضعيف مش مستحمل
وجاي على نفسك وبتتألم
ودموعك محبوسة في عنيك
تتلألأ زي جواهر نور
ورا بعض مستنية الدور
تنزل وتسيل على خدك
جرب إحساس
إنك مخنوق بتحايل روحك
اصحا وفوق
الخنقة دي رفاهية
أنت متملكهاش
جرّب إحساس
الوحدة بجد
وأنت في وسط الكل وحيد
وأفكارك سكين بتقطع
ودمك سايل من الوريد
والكل حواليك سعيد
ولا حد داري بيك
جرب إحساس
الفقد بجد
لو مات الواحد
بنبقى عارفين
هو رايح فين
الفقد إنك تكون
موجود وسط الأحياء
ولا حد بيك حاسس
ولا حد بيك داري
وأنت عمال في مشاعرك تداري
وتقاوح وتقول: أنا بخير
وأنت بتتقطع مع كل همسة طير
في الأول وفي الآخر هتفضل وحيد
لأنك مش زيهم إنت في مشاعرك غير
