توت توت
بقلم: محمد عبد العزيز رمضان
توت توت.. قطر يفوت
توت توت.. كدا ويعود
يالا يا بابا.. وأنتِ يا ماما
أنا بتمنى.. الفرح يعود
نرسم ضحكة.. كدا ورا ضحكة
بسمة خفيفة.. بالمظبوط
توت توت.. قطر يفوت
توت توت.. كدا ويعود
أنا مستني.. اللمة الحلوة
جوا بيوتنا.. مش هتموت
ونغني سوا.. غنوة في غنوة
ونعدي سوا.. موج وسدود
يا ما لعبنا.. مع بعضينا
فوق السور.. والسور موجود
لما بشوفه.. برجع تاني
طفل صغير.. نفسه يعود
يركب قطر.. وينسى همومه
أصله خلاص.. حلو زغنطوط
معروف عنه.. بإن شقاوته
سر حلاوته.. كان محسود
توت توت.. قطر يفوت
توت توت توت
كدا ويعود
خدني يا بابا.. في رحلة جميلة
هنشوف فيها.. نمور وأسود
وكلاب تجري.. ورا بعضيها
وقرود ترقص.. ويَّا قرود
وملاهي.. نتدحرج فيها
نتنطط.. في بساط مشدود
والأرض الخضرة.. هنسقيها
وهتطرح أزهار.. وورود
توت توت.. قطر يفوت
توت توت.. كدا ويعود
اللي اتلسع م الشوربة…لو نفخ ف الزبادي يبقي عبيط!!
متخيل واحد ماسك علبة زبادي و واقف ينفخ فيها ..و حجته انه زمان اتلسع من شوربة!!
اللي اتلسع م الشوربة ينفخ ف الشوربة اللي زيها…
عشان الزبادي مالوش اي ذنب ف خبراتك السودة مع الشوربة
وانت حرام تضيع وقتك ونفسّك وانت قاعد تنفخ ف زبادي!!
اللي اتلسع م الشوربة يروح يرطب لسانه بالزبادي أحسن مش يبقي اهبل ويقف ينفخ فيه و يقطع نفسه
ماتخلوش تجارب سيئة قديمة وعدت خلاص…تبوظ استمتاعكم بلحظات حلوة جاية
