صاحب همم واحتياجات
بقلم: أمل حمدي
خلينا نبقى على اتفاق
إن أنا أقبل قوي إني أتصنف معاق
عادي يعنى لما توصفني وصفي
إياك فاكرني مستني منك
كام مجاملة أو نفاق
يا سيدي عادي
معاق معاق
أنا عارف إني مختلف عنك حاجات
وإن حياتي غريبة يعني
يمكن ناقصها آه حاجات
بس اتفاقي معاك هيبقى متلخص كده
ف عدة نقاط
أنت لازم تعترف أني بعافر في الحياة زيك تمام
وإني أقدر ع الصعاب
ع التحدي وع الصدام
عمري ما حلمت أبقى زيك
حلمي أكبر يا همام
أنا شوفت أيام إن حكيتها
مش هيسعفني فيها كلام
أنا بس عاوزك تعترف
إن الحياة دي مش سباق
وإني لازم أبقى بجري
عشان أساوي ف يوم خطاك
مش قادر أجري ومش موافق ع السباق
عمرك سمعت عن واحد اسمه
سيدنا عمرو ابن الجموح
لما طبول الحرب دقت
قام سن سيفه
عياله وقفوا له تعالى فين تروح؟
عذرك معاك أنت معاق
خليك هنا وبلاش مخاطر أو جروح
سيدنا عمرو ما سمعش منهم
أصله راجل كان طموح
قال نفسي في الجنة
وفوز كده في السباق
شافوا النبي بعرجته في الجنة يمشي وسط الرفاق
سيبك أنت م اللي يقولك
سموه صاحب همم واحتياجات
دي مسميات
اعترفوا بس بوجوده
والتزموا أمره بالاتفاق
قولوا عليه إنسان
خلق معاق
