إمبارح كنت واخد
قرصين حبوب شجاعة
وفضلت لوحدي أصرخ
وأخبط بالبتاعة
وأقلب في اللي فات
وأزغزغ في السكات
علشان يضحك ويحكي
واصيبه بالخلاعة
فتحت زرار قميصي
وقلت ما بدهاش
أنا لازم أقول براحتي
وفصاحتى ما أردهاش
هتخلص من ضغوطي
من غير ما افرض شروطي
وأجمع فوق شطوطي
حاجات ما قبلتهاش
لكن كان نفسي فيها
وحلمت تكون معايا
وإن استفردت بيها
هبعزق في العطايا
آن الأوان يا عالم
أواجه نفسي بيا
واطلب بكل همة
كل اللي شايفه ليَّ
إن شالله أعيش لي ساعة
من غير ما اكون ضحية
و اخبط بالبتاعة
علشان صاحب قضية
منظورة بقالها مدة
وما حدش بت فيها
وأنا أصلي بقالي مدة
عايش معتل بيها
ونفسي في حكم عادل
واخد من نفسي حقي
أنا عشت عليه اطبطب
رغم إني تملي ضدي
ورافض إنى أماين
بالع لسان صراحتى
قررت خلاص وحالًا
اكلمكم براحتي
واحكي لكم كل حاجة
فرادى أو جماعة
بس تخلوني دايمًا
أخبط بالبتاعة
