دورك فى الحياة

دورك فى الحياة

بقلم/ تهادا الحريري

كتير بنسأل نفسنا أنا مين ودورى إيه فى الحياة ؟
أنا ربنا خلقنى ليه ؟ أو إحنا موجودين ليه فى الدنيا دى ؟
الغالب هيقول طبعا عشان نعبد ربنا .. والقلة تقول عشان نعمر الارض

عبادة ربنا سبحانه وتعالى ده الجانب الروحانى فى حياتنا والجزء اللى بنغذى بيه روحنا ولو هو خالقنا بس عشان عبادته يبقى نفضل طول الوقت بنصلى ونصوم ونقرأ قرءان ونسبح وبس
لا أكل بقى ولا شرب ولا شغل ولا جواز ولا ..

ربنا سبحانه وتعالى خلق الانسان وفضله على كثير ممن خلق تفضيلا والاكيد انه مخلقناش كدة عبثاَ من غير هدف نسعى لتحقيقه
لو بصينا على ديننا هنلاقى انه بيشجع الانسان يبدع وينتج ويفيد فعن أنس رضى الله عنه قال :
قال رسول الله صلى الله عليه وسلم ” ان قامت الساعة وبيد احدكم فسيلة فان استطاع ان لا يقوم حتى يغرسها فليفعل ” صدق رسول الله صلى الله عليه وسلم

يعنى معنى كدة إننا مش مخلوقين للعبادة فقط يعنى كل واحد فينا ليه دور جوهرى فى إعمار الارض
كل واحد ربنا خلقه فيه ميزة عن غيره وجواه شغف لحاجة معينة يقدر يطور فيها وينميها ويفيد بيها وانت تقدر تكون إنسان ناجح وليك دور مؤثر على الاقل فى حياة اللى حواليك

طيب أنا إيه دورى فى الحياة ؟

عشان تجاوب على السؤال ده لازم تعرف الأول ” انت مين ..؟”
لو عرفت اجابة السؤال ده يبقى انت كدة عديت نص المسافة كل واحد عنده قدرات ومؤهلات مختلفه من شخص للتانى وممكن تكون افضل من غيرك فى حاجات معينة ربنا وهبها ليك إنت مخصوص لكن الفرق بينك وبين أى حد تانى إنك تعرف قدراتك وإمكانياتك دى وتعرف إزاى تستغلهم وتستخدمهم إنهم يساعدوك إنك تنجح وتحقق اللى بتتمناه وتأدى دورك

إعرف إيه شغفك .. إيه هى نقاط قوتك . وإيه هى نقاط ضعفك ..
إعرف إيه هو هدفك ؟

إرجع بالذاكرة لورا وإفتكر إيه اللى كنت بتحبه وبتحب تعمله وإنت صغير وكنت بتبقى مبسوط وإنت بتعمله وكان نفسك توصل لايه ؟
وقارن بين نفسك زمان ونفسك دلوقتى وشوف انت وصلت لإيه وحققت إيه ولسه عايز تحقق إيه.
بص على وقت فراغك بتستغله إزاى وفى إيه
إيه هى أراء اللى حواليك فيك وشايفين فيك إيه او موهوب فى إيه ومتميز فيه.

إكتب كل الأمور اللى إنت بتتقنها والمهارات اللى عندك وحطهم قدامك وكل يوم تقراهم وتفكر نفسك بيهم وضيف عليهم مهارات جديدة كل ماتتعلمها
ده بيديك دافع وثقة فى نفسك ورغبه اكتر انك تحقق نجاحات اكبر واكبر.

حاول انك تكتشف نفسك اكتر .
. أنا بكون فى أفضل حالاتى لما أعمل ..
. أنا بكون فى أسوأ حالاتى لما أعمل ..
. إيه اللى بحب أعمله فى شغلى..
. إيه اللى بحب أعمله فى حياتى الشخصيه..

إعمل مسودة أو خطة لرسالتك فى الحياة وهدفك ودورك اللى إنت عايز تحققه وتوصله ونفسك فيه وإنك تشوفه قدام عينيك.

عرفت إنت مين وإيه رسالتك وحطيت خطتك إبدأ بقى فى التنفيذ وبلاش تسويف إتخلص من روح الكسل أو الفشل والضعف اللى جواك ومتبقاش زيك زى غيرك شايف إن كل دوره فى الحياة أشتغل وأتجوز وشقة وعربية وشكرا وكدة حياته تمام وماشى مع القطيع

لا . إنت ليك رسالة ودور عايز توصلهم حتى لو وصلتها للقريبين منك واللى حواليك بس فإنت قدرت توصل ماهو إسعى ياعبد وأنا أسعى معاك

الامام الحسن البصرى قال :-
” يا ابن آدم إنما أنت أيام كلما ذهب يومك ذهب بعضك”

فإستغل يومك ووقتك والمتاح ليك لتحقيق هدفك وإستغل كل فرصه ممكن تجيلك وتقربك من حلمك حتى لو كانت بسيطة
الحياة ساحة منافسة والبقاء فيها للأقوى أثراً حتى لو جه وقت رحيلك متكنش ندمان إنك ضيعتها دون أثر حتى لما تقابل ربنا تكون فرحان بصحيفتك والإنجازات والأعمال اللى إنت عملتها والأثر اللى سبته فى الدنيا

هو ده المعنى الحقيقى للحياة ان لكل واحد دور ورسالة لازم ناديها وإلا هنتحاسب عليها

دور جواك وإتعمق في نفسك قوى وإنت تعرف إنت مين وقدراتك إيه وخلى رسالتك ودورك واضح ومركز وسهل انك تطبقه وتطور منه وقابل للقياس من حيث النجاح و الفشل

إقرأ وإتعلم وأصقل نفسك بمعلومات وخبرات عن دورك وشوف غيرك وصل لإيه وإتعلم منه وخليهم مصدر إلهام ليك

إنك تعرف دورك هيساعدك إنك تركز مجهودك وعملك عشان تحقق الدور ده
أكيد هتقابل صعوبات وعقبات وممكن تتأخر وتتعطل وترجع تانى لكن إنجازاتك على مدى الطريق هتفضل وهيبقى أثرها كبير
إبدأ من جديد فما تأخر من بدأ.

وإفتكر .
” لا أحد يستطيع العودة للوراء وصنع بداية جديدة ولكن كل منا يستطيع أن يبدأ الأن ويصنع مستقبلا جديدا “

تهويدة كوتش