حورية
الكاتب: دكتور أسامة أبوضيف
سلم عليا …… ويارته
لا شفته ولا سلمت عليه
مديت له إيدي عشان اسلم
قام حط إيدي ما بين كفيه
ودقيقة عدت وازايك
وازاي حالك وعامل إيه
حسيت حنان لمسة إيده
ستان على حرير منه فيه
حورية نازلة من الجنة
ودي نازلة عندنا تعمل إيه
الوش بدر كدا منور
عايزله شيخ علشان يرقيه
والرمش مرصوص ع الصفين
لو حد قلب مريض تشفيه
اما الحواجب مرسومة
لو شافها ميت راح تحييه
والطرحة نازلة بيتدلع
ع الكتف قال إيه بتدفيه
والشعر من تحت الطرحة
خصلاية باينه ياعيني عليه
اسود واصغر على دهبي
على أرجواني على أبصر إيه
ولما ضحكت لي سنانها
صفين سنان مدهونه لاكيه
ف الشمس يعكس نور الشمس
والضلمة بينور وحديه
بأة فيه كدا جمال ف الدنيا
أمال جمال الآخرة دا إيه
طلبت ليها عصير مانجو
وطلبت ليا واحدة كافيه
ساعتين وعدوا من عمري
عدوا بسرعة ازاي كدا ليه
وفجأة وقفت ضحكتلي
وقالت لي يالله كفاية بابيه
ضحكت انا برو ملامة
والحزن في عنيا مخبيه
قلتلها رقمك كام قالت
هات رقمك انت ارن عليه
