كنت فين من زمان!!

خواطر بقلم: دعاء الراجحي

كنت فين؟ وجيتلي منين؟ وكنت فين من سنين؟

صحيت حاجات كتير كانت غايبة وليها حنين..

قبلك كانت الدنيا صعبة.. الطريق ضلمة..

والمعافرة مش مستاهلة..

عارف يعني إيه روح تقابل روح.. وتنسيه كل الجروح..

عارف يعني إيه أما بتحكي عن ال كسروا قلبك يوم..

ببقى عايزة أحط قلبي وحبي مكان الهموم..

ال زيك ميستاهلش ينجرح.. وال سرقوا الفرحة منك..

يومهم جاي بس احنا مش حننجرح..

يا سلام عالقعدة معاك.. هناك جنب الشباك..

مش قصر و لا عمدان..

بس راحة البال والقلب بمليون بستان..

كنت فين من زمان!!

يا ال الفرحة معاك عرفتلها عنوان..

بعد ما كنت اتعودت عالنسيان..

نسيان الونيس واتعودت عالحرمان..

كنت عايشة حياتي عادي.. بحب نفسي وفيها براضي..

بس ال حصل مش عادي.. جتلى كده من غير حسبان..

كنت فين من زمان!!

كان لازم الحياة تدوخنا.. وتدوقنا من سم ناس كانو أحبابنا..

لا صانوا يوم عشرة.. ولا كانو بيفكروا في بكرة..

لا عرفوا معنى الأصيل.. و لا قدروا كل جميل..

بس إنت جيت.. ومسحت كل ال فات..

بحنيتك ومعندكش خد وهات.. بتدي من غير حساب..

وكرمك بيفتح للسعادة أبواب.. أما بتشوف ال معاك مرتاح..

كنت فين من زمان!!

يلا نعوض سنين الحرمان.. إنت تستاهل تعيش أحلى أيام.. لأنك باختصار إنسان.. لا بيعرف أذية ولا حكاوي فاضية.. إنسان جميل بيشوف كل شيء جميل..

و عمره ما بينكر الجميل..

كنت فين من زمان!!

يا فارس أحلامي.. للي جاي واللي كان..

كنت فين من زمان!!

كان لازم كل ده يعدي.. ما الحلو مش بييجي بدري..

لا بإيدك ولا بيدي.. كله من عند الرحمان..

كنت فين من زمان!!

كنت في وسط دوامة الحياة.. بتدور على طوق النجاة.

كنت فين من زمان..

ياللي الضلمة معاك بقت نور.. و الحزن معاك بقى سرور..

يا نسمة الهوا الصافي.. في وسط غيوم الأيام..

كنت فين من زمان!!

كنت فين من زمان!!