أدبي

إنسان من طين

وقت النشر : 2021/12/14 09:58:49 PM

إنسان من طين
بقلم: هدى إسماعيل

أنا كل تضاد الكون فيا
أضحك وأبكي بدون إنذار
أجري وأضيع وبدون عنوان
أدافع عن الحَق وأهله
وساعات ظالم وكتير مظلوم
عارفين زقزقة العصافير
بتغني في قلبي وبيا تطير
ودموع الحزن أما بتعصف ولا ليها مثيل
************
عايز الدنيا مثالية
وساعات بسمعها في أغنية
أوقات بشوف الدنيا ظلام
ولا ينفع فيها أي كلام
الحق ضايع بين ناسها
متعوس من يرجو لها إصلاح
وأرجع وأقول ده الخير موجود ليوم الدين
والبني آدمين دول مساكين صابرين
علي قهر الدنيا وغلب سنين
إمتي هينور ليهم نور
ويعيشوا حياتهم بالمعقول
**************
هو أنا مجنون ولا أنا عاقل؟!
في دنيا تحير كل عقول
أنا مش محتار من نفسي
أنا عارف إني بشر من طين ومنيش معصوم
أنا عايز الكون كله يطرح أفراح
أنا عايز الدنيا تكون جنة
الكل يعيشها ببال مرتاح
أنا عارف إن في قلبي
غناوي ودموع.. أحزان وصراخ
بس أنا هتمسك بإيماني
إن في يوم الدنيا تغير أو تتغير
وإن الحزن العابس فيها راح يبقي نعيم
وإن الظلم الموجود فيها
ما هيبقي مقيم
***************
أنا مش مجنون
وبشوف الدنيا بيجي مية لون
أوقات مخنوق وكلامي سكوت
أوقات مجنون ولا حتى بفوق
أوقات أشوف الكون حرية
وساعات مسجون في سجون عبودية
أوقات أحب الناس جدا
أوقات ولا أطيق منهم إنسان
جوايا حد بسيط جدا
وساعات فرعون محتاج لهامان
أنا مش مجنون
أنا عاقل جدا جدا
أنا إنسان
عايش في دنيا تجن جنون
أصل أنا موجوع
أوقات جوايا أفراح
مية شكل ولون
أتمني أوزعها ع الدنيا
وتعيش في سكون
***************
والله يا ناس
هي الدنيا بأحوالها
يحتار كل عاقل منها
وكمان مجنون
أما أنا عن نفسي وبنفسي
إنسان من طين
يحوي في قلبه أهوال الكون
أنا مش مجنون
علشان كده ولا يفرق ويايا كل حكاية
إن ربي أراد ليا سعادة حتما هتكون
أنا أصلي عايش بإرادة من رب الكون
وأكيد بكرة هتتعدل وأعيش ممنون

إنسان من طين                                                                                                                                                   هدى إسماعيل.

ذات صلة

اترك رد

شاهد أيضاً
إغلاق
زر الذهاب إلى الأعلى