أدبي

هو أنا ما لي؟!

وقت النشر : 2021/12/25 06:57:35 PM

هو أنا ما لي؟!
بقلم: هدى إسماعيل

في قلبي كلام يمكن حيرة
يمكن لهفة أو أحلام
في قلبي أنين
مش مفهوم وبجد حزين
مش فهماني ومش عارفاني
أنا محقوق أو أنا حقاني
مش فهماني
**************
أجري أدوّر على أفراح
تطرح أحزاني
أجري أدوّر على خلاني
يزيد حرماني
أجري أدوّر على طريق
ألقاه وداني
على غربة وتوهة
فأعيش وحداني
كل سعادة تنزف دمعة
كل إرادة محتاجة شمعة
أفرح فرحي يهرب مني
ولايطمني
وأرجع تاني مش عارفاني
******************
حتى ورودي بقت نكراني
إيه غيرني وإيه بدلني؟!
بقى معقولة!!!
كلمة بقسوة تبدل حالي
وتخليني ما نمش ليالي
وتخليني أعيد حساباتي
وكل حياتي في لحظة قصادي
ترجع تاني
********************
أصل الكلمه دي سيف بتار
هي حقيقة ولا هزار؟!
حاسب قبل ما تنطق كلمة
فكر قبل ما ترمي رصاصة
تقتل قلب وتقتل روح
تملا طريق الورد جروح
وتخليني أبكي وأنوح
وتخليني أبقى بجد
مش عارفاني ومش فهماني
******************
أيوه صحيح أنا واحدة بسيطة
كل الدنيا في عيني بسيطة
بس القلب ساعات بينوح
ينزف دم ويا دموع لما يلاقي
اللي فاهمهم مش فاهمينه
واللي عارفهم مش عارفينه
كأنه غريب أو ناكرينه
ليه، هو أنا بس في يوم قصرت؟!!
ولا غير سعدهم اخترت
طب أنا هبعد بس ياريت
يسيبوني في حالي
*******************

هو أنا ما لي؟!.

تمت المراجعة والتنسيق من قبل فريق ريمونارف.

شاهد أيضاً
إغلاق
زر الذهاب إلى الأعلى