![سِكِّة سفر](https://aladadalawalnews.com/wp-content/uploads/2022/01/272290870_1116857835821610_5651276569726801195_n-454x470.jpg?v=1645598899)
سِكِّة سفر
بقلم: أمل أمين
إللي بيني وبين هواك
سكة سفر
طولها عُمر
ما بين شروق الشمس لحظة
وليل طويل من غير قمر
حبك أنت زي وهم
لعبة ولعبها القدر
هداني بيك
من غير ميعاد
شوفتك ملاك غير البشر
وطلعت ذنب
عمره ما في يوم يغتفر
عشقك غريب زي العسل
بطعم مُر
طبعك عجيب بحضور عليل
مش مستقر
شايف هزيمتي بمية دليل
صبحت ليك مملوك ذليل
وأنا إللي دايمًا كنت حر
كنت ليك، ومعاك، وبيك
شوفت دنيايا بعنيك
كل ثانية معاك بتبكي حسرتي
افتكرت إزاي لُقاك مع لهفتي
وفي غيابك غِرقت ويّا دمعتي
وفي عتابك كان سؤالي وقهرتي
وكان جوابك وقتها معنى حقيقي لكسرتي
ياللي افتكرت وإني جنبك
هيكون كياني وعزتي
تفتكر، إيه تاني أقوله؟!
حتى صمتي وهمسي قرب ينتحر
الحروف من حيرتي تاهت
والكلام بقا شكله باهت
والمعاني باعتني زيك
حاسه عقلي بيتعصر
ياللي كنت في ليلي حلمي
نور حياتي وكل أملي
شوفت عمر جديد لعمري
بس انتهى كل التمني
لما هُنت وقلبي خاني
وهان عليك أدام عينيك
وما بين إيديك مارحمتهوش
وسيبته يتكسر .
تمت المراجعة والتنسيق من قبل فريق ريمونارف.